காதல் தலையணைகள்...1

*
உன் பெயரெழுதி
நீ தைத்துக்கொடுத்த தலையணைக்கும்
நீ வந்து போகிற என் கனவுகளுக்கும்
இடையிலான
என்னை தூங்க வைப்பது
யாரென்கிற சண்டையில்
தொலைந்து போகிறது என் தூக்கம்
ஒவ்வொரு நாளும்....

*
நேற்றிரவு
என் கனவில் நீ
என் தலையணை முழுவதும்
பூவாசம்...


*
சென்ற வருடம்
ஏதோவொரு விடுமுறைநாளில்
எங்கள் வீட்டுக்கு வந்திருந்த நீ
என் படுக்கையில் உறங்கிச்சென்றிருந்தாய்
போகும் பொழுது
என் உறக்கத்தையும்
ஏன் கொண்டுபோனாய்...


*
நீயில்லாத நாட்களில்
உன்னைப்போலவே
தூக்கம் கலைகிற அதிகாலையில்
என் மார்பில் உறங்கிக்கொண்டிருக்கிறது
உன் தலையணை...



*
உண்மையைச்சொல் நேற்றிரவு
என் தலையணையில் தானே துங்கினாய்
இரவு முழுவதும்
உன் தலையணையின் விசும்பல்
என் கனவுகளில் கேட்டதே...


*
எத்தனை முறை சொல்லியிருக்கிறேன்
நாம் பிரிந்திருக்கும் நாட்களில்
என் தலையணைகளை பாவிக்காதே என்று
இரவு முழுவதும் என்னையிங்கே
தூங்க விடவில்லை
உன் பூவாசம்...